കൊച്ചി: സംസ്ഥാനത്തെ സഹകരണ സംഘങ്ങളുടെ വാർഷിക പൊതുയോഗം നടത്തുന്നതിനുള്ള സമയപരിധി ദീർഘിപ്പിക്കുന്ന ഉത്തരവ് പുറത്തിറങ്ങാത്തതിൽ സഹകരണ മേഖലയിൽ ആശങ്ക. സമയപരിധി ദീർഘിപ്പിക്കൽ സംബന്ധിച്ച ഉത്തരവ് എല്ലാ വർഷവും നേരത്തെ പുറപ്പെടുവിക്കുന്നതിന് സ്ഥിരമായ സംവിധാനം ഏർപ്പെടുത്തണമെന്ന് സഹകരണ സംഘം രജിസ്ട്രാറോട് വിവിധ സംഘടനകൾ ആവശ്യപ്പെട്ട് ദിവസങ്ങൾ പിന്നിട്ടിട്ടും സഹകരണ വകുപ്പിൽ നിന്ന് ഇതുസംബന്ധിച്ച ഉത്തരവ് പുറത്തുവന്നിട്ടില്ലെന്നാണ് ആക്ഷേപം.

സഹകരണ നിയമപ്രകാരം സാമ്പത്തിക വർഷം അവസാനിച്ചതിന് ശേഷം ആറുമാസത്തിനകം, അതായത് സെപ്റ്റംബർ 30നകം, വാർഷിക പൊതുയോഗം നടത്തേണ്ടതുണ്ട്. പൊതുയോഗം ചേരുന്നതിന് കുറഞ്ഞത് 15 ദിവസം മുമ്പ് അംഗങ്ങൾക്ക് നോട്ടീസ് നൽകുകയും വേണം.

എന്നാൽ വിവിധ കാരണങ്ങളാൽ ഓഡിറ്റ് നടപടികൾ പൂർത്തിയാകുന്നതിനും ഓഡിറ്റ് റിപ്പോർട്ട് സഹകരണ സംഘങ്ങൾക്ക് ലഭിക്കുന്നതിനും കാലതാമസം നേരിടുന്നുണ്ട്. ഇതുമൂലം നിയമപരമായ സമയപരിധിക്കുള്ളിൽ വാർഷിക പൊതുയോഗം നടത്തുന്നതിൽ സംഘങ്ങൾ പ്രായോഗികവും നിയമപരവുമായ ബുദ്ധിമുട്ടുകൾ നേരിടുന്നതായി സഹകരണ വീക്ഷണം ചൂണ്ടിക്കാട്ടി.

വൈകിയെത്തുന്ന ഉത്തരവ് പ്രയോജനപ്പെടുന്നില്ല.

നിലവിൽ സമയപരിധി ദീർഘിപ്പിച്ചുകൊണ്ടുള്ള ഉത്തരവ് പലപ്പോഴും സെപ്റ്റംബർ 30ന് തൊട്ടുമുമ്പാണ് പുറപ്പെടുവിക്കുന്നത്. എന്നാൽ 15 ദിവസത്തെ നോട്ടീസ് കാലാവധി നിർബന്ധമായതിനാൽ സെപ്റ്റംബർ 30ന് പൊതുയോഗം നടത്തേണ്ട സംഘങ്ങൾ സെപ്റ്റംബർ 15നകം തന്നെ അംഗങ്ങൾക്ക് നോട്ടീസ് നൽകേണ്ട സാഹചര്യമാണുള്ളത്.

അതിനാൽ സമയപരിധി ദീർഘിപ്പിക്കുന്ന ഉത്തരവ് അവസാന നിമിഷം പുറത്തിറക്കുന്നത് പല സഹകരണ സംഘങ്ങൾക്കും പ്രായോഗികമായി പ്രയോജനപ്പെടുന്നില്ലെന്നാണ് സഹകരണ മേഖലയിലെ സംഘടനകളുടെ നിലപാട്.

സെപ്റ്റംബർ 10ന് മുമ്പ് ഉത്തരവ് വേണം.

വാർഷിക പൊതുയോഗത്തിന്റെ സമയപരിധി ദീർഘിപ്പിക്കുന്ന ഉത്തരവ് എല്ലാ വർഷവും സെപ്റ്റംബർ 10ന് മുമ്പായി നിർബന്ധമായും പുറപ്പെടുവിക്കുന്നതിന് സ്ഥിരമായ സംവിധാനം ഏർപ്പെടുത്തണമെന്നാണ് സഹകരണ വീക്ഷണത്തിന്റെ ആവശ്യം.

ഉത്തരവ് മുൻകൂട്ടി പുറപ്പെടുവിച്ചാൽ നിയമപരമായ 15 ദിവസത്തെ നോട്ടീസ് കാലാവധി പാലിക്കാനും, ഓഡിറ്റ് റിപ്പോർട്ട് ഉൾപ്പെടെയുള്ള രേഖകൾ പരിശോധിക്കാനും, അംഗങ്ങൾക്ക് ആവശ്യമായ വിവരങ്ങൾ മുൻകൂട്ടി നൽകാനും സംഘങ്ങൾക്ക് കൂടുതൽ സമയം ലഭിക്കും. ഇതുവഴി കൂടുതൽ സുതാര്യമായ രീതിയിൽ വാർഷിക പൊതുയോഗങ്ങൾ നടത്താനും സാധിക്കുമെന്ന് സഹകരണ വീക്ഷണം വ്യക്തമാക്കുന്നു.

സഹകരണ സംഘങ്ങളുടെ പ്രായോഗിക ബുദ്ധിമുട്ടുകൾ പരിഗണിച്ച് അടിയന്തരമായി ആവശ്യമായ നടപടി സ്വീകരിക്കണമെന്ന് സഹകരണ വീക്ഷണം സംസ്ഥാന കോ-ഓർഡിനേറ്റർ അരുൺ ശിവാനന്ദൻ, വർക്കിംഗ് ചെയർമാൻ ശ്രീജിത്ത് മുല്ലശ്ശേരി, വൈസ് ചെയർമാൻ സാജു ജെയിംസ് എന്നിവർ ആവശ്യപ്പെട്ടു.

പ്രധാന ആവശ്യം

“സമയപരിധി ദീർഘിപ്പിക്കൽ ഉത്തരവ് അവസാന നിമിഷമല്ല; സെപ്റ്റംബർ 10ന് മുമ്പ് സ്ഥിരമായി പുറപ്പെടുവിക്കണം.”