അഖിലേന്ത്യ സഹകരണ വാരാഘോഷം നവംബർ 14ന് എറണാകുളത്ത്
സംസ്ഥാനതല ഉദ്ഘാടനം മുഖ്യമന്ത്രി വി.ഡി. സതീശൻ നിർവഹിക്കും; സമാപന സമ്മേളനം മന്ത്രി എം. ലിജു ഉദ്ഘാടനം ചെയ്യും
തിരുവനന്തപുരം: അഖിലേന്ത്യ സഹകരണ വാരാഘോഷത്തിന്റെ സംസ്ഥാനതല പരിപാടികൾ നവംബർ 14ന് എറണാകുളത്ത് സംഘടിപ്പിക്കും. ഒരാഴ്ച നീണ്ടുനിൽക്കുന്ന വാരാഘോഷ പരിപാടികൾക്ക് മുഖ്യമന്ത്രി വി.ഡി. സതീശൻ ഉദ്ഘാടനം നിർവഹിക്കും. സമാപന സമ്മേളനം കാസർകോട്ട് സഹകരണ മന്ത്രി എം. ലിജു ഉദ്ഘാടനം ചെയ്യും.
വാരാഘോഷം വിജയിപ്പിക്കുന്നതിന്റെ ഭാഗമായി ഈ മാസം 14ന് എറണാകുളത്തും ,26ന് കാസർകോട്ടും ആലോചനാ യോഗങ്ങൾ വിളിച്ചുചേർക്കാൻ സഹകരണ മന്ത്രിയുടെ അധ്യക്ഷതയിൽ ചേർന്ന യോഗം തീരുമാനിച്ചു.
സംസ്ഥാനത്തെ മുഴുവൻ സർക്കിൾ സഹകരണ യൂണിയനുകളിലും വാരാഘോഷത്തിന്റെ ഭാഗമായി നവംബർ 15 മുതൽ 19 വരെ സെമിനാറുകളും പ്രചാരണ പരിപാടികളും സംഘടിപ്പിക്കും. നവംബർ 14ന് നടക്കുന്ന സംസ്ഥാനതല ഉദ്ഘാടന ദിനത്തിൽ കേരളത്തിലെ മുഴുവൻ സഹകരണ സ്ഥാപനങ്ങൾക്കു മുന്നിലും സഹകരണ പതാക ഉയർത്തും.
വാരാഘോഷത്തിന്റെ സന്ദേശം ജനങ്ങളിലെത്തിക്കുന്നതിനായി എല്ലാ സഹകാരികളും മുന്നോട്ടുവരണമെന്ന് സംസ്ഥാന സഹകരണ യൂണിയൻ ചെയർപേഴ്‌സൺ കോലിയക്കോട് എൻ. കൃഷ്ണൻ നായർ അഭ്യർഥിച്ചു.
യോഗത്തിൽ സഹകരണ യൂണിയൻ ചെയർപേഴ്‌സൺ കോലിയക്കോട് എൻ. കൃഷ്ണൻ നായർ, സഹകരണ വകുപ്പ് സെക്രട്ടറി വീണ എൻ. മാധവൻ, സഹകരണ സംഘം രജിസ്ട്രാർ കെ. ഇമ്പശേഖർ, സഹകരണ കാർഷിക ഗ്രാമവികസന ബാങ്ക് അഡ്മിനിസ്ട്രേറ്റീവ് കമ്മിറ്റി കൺവീനർ സി.കെ. ഷാജി മോഹൻ, മാർക്കറ്റ്ഫെഡ് ചെയർമാൻ സോണി സെബാസ്റ്റ്യൻ എന്നിവർ പങ്കെടുത്തു.
