തൃശ്ശൂർ: കേരള അർബൻ ബാങ്ക് സ്റ്റാഫ് ഓർഗനൈസേഷന്റെ (KUBSO) സംസ്ഥാന സമ്മേളനം 2026 ഡിസംബർ 12, 13 തീയതികളിൽ തൃശ്ശൂരിൽ സംഘടിപ്പിക്കും. സമ്മേളനത്തിന്റെ വിജയകരമായ നടത്തിപ്പിനായി സ്വാഗതസംഘം രൂപീകരിച്ചു. ഇതിന്റെ ഭാഗമായി തൃശ്ശൂർ അർബൻ ബാങ്ക് ഹാളിൽ ചേർന്ന സ്വാഗതസംഘ രൂപീകരണ യോഗവും സ്വാഗതസംഘം ഓഫീസും തൃശ്ശൂർ എം.എൽ.എ ശ്രീ. രാജൻ ജെ. പല്ലൻ ഉദ്ഘാടനം ചെയ്തു.
കേരളത്തിലെ അർബൻ സഹകരണ ബാങ്കുകളിലെ ജീവനക്കാരെ പ്രതിനിധീകരിക്കുന്ന സംഘടനയുടെ സംസ്ഥാന സമ്മേളനത്തിന് മുന്നോടിയായാണ് സ്വാഗതസംഘ രൂപീകരണ യോഗം ചേർന്നത്. സമ്മേളനത്തിന്റെ സംഘാടന പ്രവർത്തനങ്ങൾ ഏകോപിപ്പിക്കുന്നതിനും വിവിധ തലങ്ങളിലുള്ള ഒരുക്കങ്ങൾ ക്രമീകരിക്കുന്നതിനും സ്വാഗതസംഘത്തിന്റെ പ്രവർത്തനം സഹായകമാകും.
KUBSO സംസ്ഥാന വർക്കിങ് പ്രസിഡന്റ് എം. ബിജു യോഗത്തിൽ അധ്യക്ഷത വഹിച്ചു. തൃശ്ശൂർ മുൻ മേയറും തൃശ്ശൂർ അർബൻ ബാങ്ക് വൈസ് ചെയർമാനുമായ ശ്രീ. ഐ. പി. പോൾ മുഖ്യാതിഥിയായി പങ്കെടുത്തു.
കോർപ്പറേഷൻ കൗൺസിലർ ശ്രീ. ബൈജു വർഗീസ്, KUBSO സംസ്ഥാന ട്രഷറർ കെ. പി. സെബാസ്റ്റ്യൻ, സുരേഷ് താണിയിൽ, രാജൻ ജോസ്, ജോർജ് ജോസഫ്, സി. എ. ജോസ്, എസ്. സുധീർ, സജീഷ് ശങ്കുണ്ണി എന്നിവർ യോഗത്തിൽ പ്രസംഗിച്ചു. സംസ്ഥാന സമ്മേളനവുമായി ബന്ധപ്പെട്ട സംഘടനാപരമായ പ്രവർത്തനങ്ങളിൽ വിവിധ മേഖലകളുടെ പങ്കാളിത്തവും സഹകരണവും ഉറപ്പാക്കേണ്ടതിന്റെ പ്രാധാന്യം യോഗത്തിൽ ഉയർന്നുവന്നു.
KUBSO സംസ്ഥാന ജനറൽ സെക്രട്ടറി ഇ. ടി. രാജീവൻ യോഗത്തിൽ സ്വാഗതം ആശംസിച്ചു. തൃശ്ശൂർ യൂണിറ്റ് പ്രസിഡന്റ് ബാബു ജോസഫ് നന്ദി രേഖപ്പെടുത്തി. കേരള അർബൻ ബാങ്ക് സ്റ്റാഫ് ഓർഗനൈസേഷൻ ജനറൽ സെക്രട്ടറി ഇ. ടി. രാജീവൻ അറിയിച്ചു .
