കണ്ണൂർ: ഇന്ത്യയുടെ ‘പാൽക്കാരൻ’ എന്നറിയപ്പെടുന്ന ഡോ. വർഗീസ് കുര്യന്റെ സ്മരണാർത്ഥം കാലിക്കറ്റ് സിറ്റി സർവീസ് കോ-ഓപ്പറേറ്റീവ് സൊസൈറ്റി മലബാറിലെ മികച്ച പാലുൽപാദക സഹകരണ സംഘത്തിന് ഏർപ്പെടുത്തിയ ഒരു ലക്ഷം രൂപയുടെ കാഷ് അവാർഡിന് കണ്ണൂർ ജില്ലയിലെ പഴശ്ശിരാജാ നഗർ ക്ഷീരോൽപാദക സഹകരണ സംഘം അർഹരായി.
2026 സെപ്റ്റംബർ 5ന് സംഘത്തിന്റെ ചാലപ്പുറം ഹെഡ് ഓഫീസിൽ നടന്ന ചടങ്ങിൽ ഉന്നതവിദ്യാഭ്യാസ വകുപ്പ് മന്ത്രി ശ്രീ. റോജി എം. ജോൺ അവാർഡ് വിതരണം ചെയ്തു. സംഘത്തിന്റെ പ്രസിഡന്റ് ശ്രീമതി ഗീത എം.യും സെക്രട്ടറി ശ്രീ. അരുൺയും ചേർന്ന് മന്ത്രിയിൽ നിന്ന് ഒരു ലക്ഷം രൂപയുടെ ചെക്കും ബഹുമതിപത്രവും ഏറ്റുവാങ്ങി.
ക്ഷീരകർഷകർ നേരിടുന്ന പ്രധാന വെല്ലുവിളികളിലൊന്ന് അടുത്ത തലമുറയെ ക്ഷീരമേഖലയിലേക്ക് ആകർഷിക്കാൻ കഴിയാത്തതാണെന്ന് മന്ത്രി റോജി എം. ജോൺ പറഞ്ഞു. ക്ഷീരകർഷകരുടെ മക്കളിൽ ഭൂരിഭാഗവും ക്ഷീരമേഖലയെ ഭാവിയിലെ തൊഴിൽ മേഖലയായി കാണുന്നില്ല. ആധുനിക സാങ്കേതികവിദ്യയും ശാസ്ത്രീയ സംവിധാനങ്ങളും പ്രയോജനപ്പെടുത്തി ക്ഷീരകൃഷിയെ വ്യവസായാടിസ്ഥാനത്തിൽ കൂടുതൽ ആദായകരമായ സംരംഭമാക്കി മാറ്റാൻ സാധിക്കുമെന്നും മന്ത്രി അഭിപ്രായപ്പെട്ടു.
ചടങ്ങിൽ എം.എൽ.എ അഡ്വ. ഫൈസൽ ബാബു, ക്ഷീരവികസന വകുപ്പ് ഡെപ്യൂട്ടി ഡയറക്ടർ ശ്രീമതി സജിനി ഒ. എന്നിവർ ആശംസകൾ നേർന്നു. മിൽമ മലബാർ റീജിയൺ എം.ഡി. ശ്രീ. പ്രേംലാൽ എം.കെ. ഡോ. വർഗീസ് കുര്യൻ അനുസ്മരണം നടത്തി.
സംഘം ചെയർപേഴ്സൺ ശ്രീമതി പ്രീമ മനോജ് അധ്യക്ഷത വഹിച്ച ചടങ്ങിൽ അഡ്വ. ടി.എം. വേലായുധൻ സ്വാഗതം പറഞ്ഞു. അഡ്വ. എ. ശിവദാസ് റിപ്പോർട്ട് അവതരിപ്പിച്ചു. എം.വി.ആർ കാൻസർ സെന്റർ ചെയർമാൻ ശ്രീ. സി.എൻ. വിജയകൃഷ്ണൻ, ഡയറക്ടർ സജീവ് വി., കാലിക്കറ്റ് സിറ്റി സർവീസ് കോ-ഓപ്പറേറ്റീവ് സൊസൈറ്റി ജി .എം സാജു ജെയിംസ് തുടങ്ങിയവർ പ്രസംഗിച്ചു.
